કશું પણ ન કહેવું ઘણું આકરું છે.

આ ધારામાં વહેવું ઘણું આકરું છે,

બધા બુધ્ધિમાનોની વચ્ચે અહીં પર,

ખરેખર તો રહેવું ઘણું આકરું છે.

ભૂજાઓને બાંધી સમંદરમાં પડવું,

અને એમાં તરવું ઘણું આકરું છે.

સમજમાં ન આવે એવી વાત પર પણ,

સમાધાન કરવું ઘણું આકરું છે.

બાંધીને પાટા બધા જેમ આંખે ,

ચાલ્યા જ કરવું ઘણું આકરું છે.

મળે નૈ મથામણ પછી તોડ એના,

વિચારોમાં રહેવું ઘણું આકરું છે.

માંગ્યુ મરણ ”સ્તબ્ધ” મળતું નથી જ્યાં,

જીવતું ય રહેવું ઘણું આકરું છે.

– કૌશલ શેઠ