મળી આજ રસ્તે તમારી સહેલી.

મળી આજ રસ્તે તમારી સહેલી;

મને યાદ આવી પછી એ હવેલી.

નજરથી નજર જ્યાં તમારી મળેલી;

મને યાદ આવ્યા એ ચંપો ચમેલી.

તમારા જીવનનો પુછ્યો હાલ જ્યારે;

તમારી સહેલી જરા બસ હસેલી

ઉકેલી શકો તો ઉકેલો તમે પણ-

પૂછી જિંદગીએ નવી આ પહેલી.

હતું દ્રશ્ય કેવું મનોહર મનોહર;

નજર સહેજ તિર્યક ને પાંપણ નમેલી.

અદા ઓઢણીની હૃદયમાં વસી તો;

હવા થઈને વાતો નગરમાં ફરેલી.

ઘણી વેદનાઓ દબાવીને ભીતર;

જુઓ એક ચંપાની ડાળી ઢળેલી.

ક્ષણોના હિસાબો ના કરતા ‘અદિશ’જી;

પરત આવશે ના ક્ષણો એ ગયેલી.

– ભરત પ્રજાપતિ ‘અદિશ’