10 હજાર લોકોના મૃત્યુ, રમકડાંની જેમ ફંગોળાઈ ગઈ અનેક બોટ: કચ્છમાં વિકરાળ વિનાશ કરનાર એ વાવાઝોડું પણ જૂનમાં જ ત્રાટક્યું હતું
Gujarat cyclone: અરબી સમુદ્રમાં બનેલા વાવાઝોડાની અસર ગુજરાતમાં વર્તાવાની શરુ થઈ ગઈ છે. વાવાઝોડું વધારે નજીક આવી રહ્યું છે તેટલી જ ગંભીર અસરો તેની થઈ રહી છે. આ વાવાઝોડાની સરખામણી વર્ષ 1998માં આવેલા વાવાઝોડા સાથે કરવામાં આવી રહી છે.
- જૂન 1998માં ગુજરાતમાં આવ્યું હતું ખતરનાક વાવાઝોડું
- ગુજરાત સહિત સમગ્ર દેશમાં થયું હતું ઘણું નુકસાન
- જૂન મહિનામાં જ આવેલા તોફાને ભયંકર તબાહી મચાવી
- બિપોરજોયને પણ 1998ના તોફાનની જેમ માનવામાં આવે છે ખતરનાક
- જૂન 1998માં આવ્યું હતું ભયંકર તોફાન
વર્ષ 1998માં આવેલું વાવાઝોડું સિંધ-ગુજરાત બોર્ડરે ટકરાયું હતું. આ વિનાશક ચક્રવાત 4 જૂને સર્જાયું હતું અને 8 જૂને લેન્ડફોલ થયું હતું. આ ચક્રવાતમાં 165 કિલોમીટર પ્રતિ કલાકની ઝડપે પવન ફૂંકાયો હતો. એક રિપોર્ટ મુજબ આ ચક્રવાતથી દેશભરમાં 10,000 લોકોના મૃત્યુ થયા હતા. જેમાં ગુજરાતમાં સૌથી વધુ મોત નોંધાયા હતા. ગુજરાતમાં 1173 લોકોના મૃત્યુ થયા હતા. જ્યારે 1500થી વધુ લોકો લાપતા થયા હતા. આ વાવાઝોડાની તબાહી એવી હતી કે આજે પણ કચ્છના લોકો આ વાવાઝોડાને યાદ કરીને કંપી ઉઠે છે. કંડલા પોર્ટને કરાયો ખાલી, રાજ્ય સરકાર એલર્ટ
8 જૂન 1998ના રોજ આવેલા વાવાઝોડાથી કચ્છના કંડલા બંદરને ભારે નુકસાન થયું હતું. આ વખતે પણ કંડલા પોર્ટને સંપૂર્ણપણે ખાલી કરાવવામાં આવ્યો છે. હજારો ટ્રકોના પૈડા સંપૂર્ણપણે થંભી ગયા છે અને બધાને દૂરના શેલ્ટર હોમમાં ખસેડવામાં આવ્યા છે. 25 વર્ષના અંતરાલ પછી ફરીથી બિપોરજોય મોટી તબાહી સર્જે તેવી આશંકા વ્યક્ત કરવામાં આવી રહી છે, જોકે, રાજ્ય સરકાર એક્શનમાં આવી ગઈ છે. વહીવટી તંત્ર પણ એલર્ટ થઈ ગયું છે.
