મહારાષ્ટ્રના પિંપરી ચિંચવડના પોલીસ સબ-ઇન્સપેક્ટર સોમનાથ ઝેંડે ડ્રીમ-11 ઍપ પરથી રૂ. દોઢ કરોડ જીત્યા છે.
સોમનાથ ઝેંડે બાંગ્લાદેશ વિરુદ્ધ ઇંગ્લૅન્ડની ક્રિકેટ મૅચ ડ્રીમ-11 ઍપના માધ્યમથી રમ્યા હતા. તેમાં તેમને દોઢ કરોડ રૂપિયાનું ઈનામ મળ્યું છે.
સોમનાથ ઝેંડે છેલ્લા દોઢ મહિનાથી ડ્રીમ-11 પર રમી રહ્યા છે.
ભાજપના પ્રવક્તા અમોલ થોરાટે હવે ઝેંડે સામે ફરિયાદ નોંધાવી છે.
એક તરફ સરકાર અને વિવિધ સંસ્થાઓ યુવા પેઢીને બચાવવાના પ્રયાસ કરી રહી છે ત્યારે પોલીસ કર્મચારી દ્વારા આવી પ્રવૃત્તિને લીધે જુગારને પ્રોત્સાહન મળશે, એવો આક્ષેપ તેમણે કર્યો છે.
સોમનાથ ઝેંડે ડ્યુટી પર હતા ત્યારે તેઓ ડ્રીમ-11 મોબાઇલ એપ પર ઑનલાઇન જુગાર રમ્યા હતા. તેમાંથી તેમને થોડા નાણાં મળ્યાં હતાં.
પોતે બહુ મહાન કામ કર્યું હોય તેવી લાગણી સાથે ખાખી ગણવેશમાં સજ્જ સોમનાથ ઝેંડેએ તેમના ફોટા અને વીડિયો સોશિયલ મીડિયા પર વાયરલ કર્યા હતા. તેથી રાજ્યના પોલીસ દળ વિશે ખોટો મૅસેજ ગયો છે, એવું પણ ફરિયાદમાં જણાવવામાં આવ્યું છે.
આ બાબતે સોમનાથ ઝેંડેએ પણ પ્રતિક્રિયા આપી હતી.
તેમણે કહ્યું હતું, "મેં ગયા મહિનાથી ડ્રીમ-11માં રોકાણ કરવાનું શરૂ કર્યું હતું. મારા અનેક દોસ્તો તેમાં રોકાણ કરે છે. મેં બાંગ્લાદેશ અને ઇંગ્લૅન્ડની ટીમ પર દાવ લગાવ્યો હતો. તેમાં મને દોઢ કરોડ રૂપિયા ઈનામ મળ્યું છે. મને બહુ આનંદ થયો છે."
"મેં તરત જ મારી પત્નીને ફોન કર્યો હતો. તેને પણ આનંદ થયો હતો. હવે હું હાઉસિંગ લોન ચૂકવીશ અને સંતાનોના નામે ફિક્સ ડિપોઝિટ કરીશ."
નિષ્ણાતોનું માનવું છે કે કર્મચારી ફરજ પર હોય ત્યારે ઑનલાઇન ગેમ રમવી તે કાયદાની વિરુદ્ધ છે અને એવા કર્મચારી વિરુદ્ધ કાર્યવાહી કરી શકાય છે, પરંતુ ઝેંડેએ જણાવ્યું હતું કે તેઓ આ બધું ફાજલ સમયમાં કરે છે.
આ સમાચાર પૂણે મિરર અખબારે આપ્યા છે.
બીબીસી મરાઠીએ ઝેંડેનો સંપર્ક સાધવાના પ્રયાસ કર્યા હતા, પરંતુ તેમનો સંપર્ક થઈ શક્યો ન હતો.ડ્રીમ-11 એક ઑનલાઇન ફેન્ટસી સ્પોર્ટ્સ કંપની છે. તેની મારફત ચાહકો ક્રિકેટ, હૉકી, ફૂટબૉલ અને બાસ્કેટબૉલમાં ઑનલાઇન પૈસા રોકીને રમી શકે છે.
ભારતીય ઉદ્યોગસાહસિક હર્ષ જૈન અને ભાવિશ શેઠે 2008માં આ કંપનીની સ્થાપના કરી હતી. 2018માં ડ્રીમ-11ના 40 લાખ યૂઝર્સ હતા. થોડા દિવસ પહેલાં આંતરરાષ્ટ્રીય ક્રિકેટમાંથી નિવૃત્ત થયેલા મહેન્દ્રસિંહ ધોની ડ્રીમ-11ના બ્રાન્ડ ઍમ્બેસેડર છે.
ડ્રીમ-11 એક ફેન્ટસી ગેમિંગ પ્લેટફોર્મ હોવાથી તેના યૂઝર્સ ક્રિકેટ, ફૂટબૉલ, બાસ્કેટબૉલ, કબડ્ડી, હૉકી અને વૉલીબૉલ રમી શકે છે. તેઓ તેમની વર્ચ્યુઅલ ટીમો પણ બનાવી શકે છે.
જે યૂઝર સૌથી વધારે પૉઇન્ટ મેળવે તેને ઈનામ મળે છે. ડ્રીમ-11 પેઈડ અને ફ્રી એમ બન્ને પ્રકારની ગેમ્સ ઑફર કરે છે.
આ ગેમ્સ રમવા માટે વ્યક્તિની વય 18 વર્ષ કે તેથી વધુની હોવી જોઈએ. ડ્રીમ-11 ગેમ રમવા માટે ગ્રાહકે પાન કાર્ડ દ્વારા ઍકાઉન્ટ વેરિફાય કરવું જરૂરી છે.
સ્માર્ટફોન, ટેબ્લેટ અને કમ્પ્યુટર જેવાં ઉપકરણો દ્વારા રમાતી રમતોને ઑનલાઇન ગેમિંગ કહેવામાં આવે છે. તેના મુખ્યત્વે ત્રણ પ્રકાર છે.
તેમાં રિઅલ મની ગેમ્સ દ્વારા વપરાશકર્તા કમાણી કરી શકે છે. તેમાં વિવિધ ફેન્ટસી ગેમ્સનો સમાવેશ થાય છે. ક્રિકેટ, ફૂટબૉલ, બાસ્કેટબૉલ, કબડ્ડી અને અન્ય ગેમ્સની ફેન્ટસી લીગ રમી શકાય છે. તેમાં રમી તથા પોકરનો પણ સમાવેશ થાય છે.
મોબાઈલ કેઝ્યુઅલ ગેમિંગમાં સ્માર્ટફોન પર રમાતી રમતોમાં કેન્ડી ક્રશ, સબવે સર્ફર અને ટેમ્પલરન જેવી ગેમ્સનો સમાવેશ થાય છે.