એશિયન ગેમ્સ 2023માં ભારતે અત્યાર સુધીમાં એક ગોલ્ડ સહિત કુલ 9 મૅડલ જીતી લીધા છે. જેમાં ત્રણ સિલ્વર અને પાંચ બ્રૉંઝ મેડલનો સમાવેશ થાય છે.
મૅડલ્સ જીતવાની યાદીમાં ભારત હાલ છઠ્ઠા ક્રમે છે. સૌથી વધુ 42 મૅડલ જીતીને ચીન હાલ પ્રથમ ક્રમે છે. શૂટિંગમાં ભારતે એક ગોલ્ડ, એક સિલ્વર અને એક બ્રૉંઝ મૅડલ જીત્યો છે.
એશિયન ગેમ્સ 2023માં ભારતે પહેલો ગોલ્ડ મૅડલ જીતી લીધો છે. 10 મીટર પુરુષ રાઇફલ ટીમને 1893.7 પોઇન્ટ હાંસિલ કરીને ગોલ્ડ જીત્યો છે.
આ સિવાય પુરુષોની ફોર-રોઈંગ સ્પર્ધામાં ભારતે બ્રૉંઝ મૅડલ જીત્યો છે. જસવિંદર, ભીમ, પુનિત અને આશીષની ટીમે 6:10.81 સમયમાં જીત પ્રાપ્ત કરી લીધી.
જ્યારે રોવિંગમાં બે સિલ્વર અને ત્રણ બ્રૉંઝ મૅડલ જીત્યા છે.
મહિલા 10 મીટર ઍર રાઇફલ શૂટિંગમાં ભારતની આશી ચોક્સી, મેહીલી ઘોષ અને રમીતાએ સિલ્વર મૅડલ હાંસિલ કર્યો છે. તો, રોવિંગમાં મૅન્સ લાઇટવેટ ડબલ સ્કલ્સમાં ભારતના અર્જુન લાલ જાટ અને અરવિંદ સિંહે સિલ્વર હાંસિલ કર્યો છે.
રોવિંગમાં મૅન્સ પેરમાં બાબુલ લાલ યાદવ અને રેહ રામે બ્રૉંઝ મૅડલ મેળવ્યો છે.
ગઈકાલથી ચીનના હાંગઝોઉમાં 19મી એશિયન ગેમ્સની શરૂઆત થઈ ચૂકી છે.
આ એશિયન ગેમ્સ 8 ઑક્ટોબર સુધી ચાલશે.
પહેલા આ રમતોત્સવ 2022માં યોજાવાનો હતો, પરંતુ કોરોના મહામારીને કારણે તેને ટાળી દેવામાં આવ્યો હતો.
આ વખતે એશિયન ગેમ્સમાં કુલ 40 રમતોનો સમાવેશ કરવામાં આવ્યો છે. આ રમતોની 61 પેટા રમતોને મેળવીને કુલ 481 સ્પર્ધાઓનું આયોજન થઈ રહ્યું છે.
ગઈકાલે યોજાયેલા એશિયન ગેમ્સના ઉદ્ઘાટન સમારંભમાં ભારતીય હોકી ટીમના કૅપ્ટન હરમનપ્રીત સિંહ અને બૉક્સર લવલીના બોરગોહાઈએ ભારતનું પ્રતિનિધિત્વ કર્યું હતું.
38 રમતોમાં ભારત તરફથી કુલ 634 ખેલાડીઓ ભાગ લઈ રહ્યાં છે. ઍથ્લેટિક્સ સ્પર્ધાઓ માટેની ટીમ સૌથી મોટી છે જેમાં ભારત તરફથી કુલ 65 ખેલાડીઓને મોકલવામાં આવી રહ્યાં છે.
આ વખતે સૌપ્રથમવાર એશિયા કપમાં ક્રિકેટનો સમાવેશ કરવામાં આવ્યો છે. ભારતે મહિલા અને પુરુષ બંને ક્રિકેટ ટીમોને મોકલી છે.
આજે રમાયેલી સેમિફાઇનલમાં ભારતીય મહિલા ક્રિકેટ ટીમે બાંગ્લાદેશને 8 વિકેટથી હરાવીને ફાઇનલમાં પ્રવેશ મેળવી લીધો છે.
ભારતે બાંગ્લાદેશે આપેલા 52 રનના લક્ષ્યને 8.2 ઓવરોમાં માત્ર બે વિકેટ ગુમાવીને જ હાંસલ કરી લીધો હતો.
ભારત તરફથી જેમિમા રૉડ્રિગ્સે 20 અને શેફાલી વર્માએ 17 રન બનાવ્યા હતા.
મૅચમાં બાંગ્લાદેશે ટૉસ જીતીને પ્રથમ બેટિંગ કરીને કુલ 51 રન બનાવ્યા હતા. ભારતે આખી ટીમને 17.5 ઓવરમાં માત્ર 51 રનમાં ઑલઆઉટ કરી દીધી હતી.
બાંગ્લાદેશ તરફથી કૅપ્ટન નિગાર સુલ્તાનાએ સૌથી વધુ 12 રન બનાવ્યા હતા, જ્યારે ભારત તરફથી પૂજા વસ્ત્રાકરે સૌથી વધુ ચાર વિકેટ ઝડપી હતી.
ભારતીય મહિલા ટીમની કૅપ્ટન હરમનપ્રીત સિંહ આ મૅચની પ્લેઈંગ 11નો ભાગ નથી. બાંગ્લાદેશ સામેની શ્રેણીમાં તેના વર્તનને કારણે તેના પર બે મૅચનો પ્રતિબંધ મૂકવામાં આવ્યો હતો.
હરમનપ્રીત સિંહ ફાઈનલ મૅચમાં ટીમની કમાન સંભાળશે.